疫情期間，有餐廳捱不了而倒下，亦有人覺得「有危便有機」，而荃灣的如心酒店正是趁住空檔日子，將中菜廳重新打造。
餐廳以大地色係為主調，配以簡潔利落的線條，原先靠玻璃的小廂房已拆去，令整個大廳空間感更強，感覺寬敞，仲可以飽覽藍巴勒海峽，遠眺大帽山的大廳名為「如山」另有「如水」。
加上增添了五間廂房及可以存放800支酒的酒窖，餐廳的硬件是更上層樓。
軟件方面，先是請茶藝師吳志泉，帶來不少別樹一幟的茶葉。
今次主要係試下中菜總廚葉振文師傅的名物，tasting
menu不單精緻，而且看得出用心。
餐前小食
先係以「話梅蕃茄」（$88）來清清味蕾，選用荷蘭車厘茄配以日本話梅粉醃製，甜酸夾雜的感覺我鍾意，咬落更有豐富的汁液，冰鎮過確實有心曠神怡之感。
再來是手功菜「松露蜜糖燕窩釀雞翼」（請於24小時前預訂）（每隻/$138），雞鎚部位去掉，中翼位褪骨，其實好花功夫，再釀入經蜜糖水泡浸過的燕窩，皮位焗至香脆，加上少許松露的香氣，口感美妙，單是前菜已令人心動。
最開心係食到葉師傅名物「至尊蜜汁叉燒」（$288），雖然欠缺炭火的加持，但脢頭肉靚，帶點冰肉位多了油香，邊位的焦香亦恰到好處，真係好想加碗白飯。
點心
-01.jpeg)
就算係晚宴，「焗南非鮑魚酥」（$98）又絕不能錯過，無他，選料好、口感佳、造型靚，包上了千層酥皮的南非鮑魚，賣相神似，就連邊位都鉅細無遺，中間的鮑魚亦煙韌有嚼口，好味。
湯
湯品又係我其中一樣喜歡的食物，有時出街食快飯，我寧願要例水都好過求其無靈魂既一杯即沖飲品，更何況「椰皇錦繡球」（$168）燉足4個鐘，真係用時間換來的美味！
原個椰皇上，一揭開便傳來陣陣椰香，以豆腐成繡球，刀功立見，松茸雞湯水清潤鮮甜，舌底生津，看似簡單，實際是極費心思。
是晚另一亮點，相信係「港式薑蔥花膠煲」（$388），花膠泡浸得大大塊，以蔥段、薑片、唐芹、蒜子及荽茜爆炒，再加入紹酒焗香，花膠充滿了膠質，入口軟滑，大人細路都啱食，真係要用刀叉享用，以$400可供4位，每人有兩塊，抵食。
或者近年多了在傳統菜色中注入新意，令中菜可以行得更遠，「遠年陳皮意大利黑醋骨」（$288）就是以意大利黑醋替代陳醋，加入25年陳皮，陣陣香氣令腩排的油膩感減低，不錯的選擇。
除了話無雞不成宴外，總係覺得要有碟菜蔬平衡一下，「松露野菌炒蘆筍」（$188）以鮮冬菇、雞脾菇同雞縱菌配蘆筍，加入幽香的黑松露醬，又幾惹味喎。
單尾係「砂鍋安格斯牛肉鵝肝飯」（$298），真係好邪惡，尤其是將鵝肝拌和了珍珠米飯，加上牛肉的油香，熱辣辣砂鍋上，又係好吸引。
甜品
高潮過後，來份平實的甜品，傳統的「蛋白杏仁茶」（$58）及「懷舊芝麻卷」（$58），黑與白、熱與凍的夾雜，甜度亦恰好，再也沒有激情，反而有種由璀璨歸於平淡的感覺。
Facebook 專頁 :
Nina Hotel Tsuen Wan West
地址 : 荃灣楊屋道8號香港如心海景酒店暨會議中心7樓
電話 : 22802923
味道 : 5 環境 : 5 服務 : 5 衛生 : 5 抵食 :
4 位置 : 4
希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝!
沒有留言:
張貼留言