喜歡去旅行既朋友，尤其是「日本控」，係疫情之下，無一年半載，都無得諗。
日本去不了，但日本美食依然可以係香港搵到，正好用作解解愁緒。
尖沙咀棉登徑一向係美食集中地，日式店子尤其多，當年慳慳地食「見城」午餐，到同食友晚上11點食「一蘭」都試過，計落真係可以由朝食到晚。
今次跟食友走訪「木戶」，店內座位不多但見心思，既有吧枱，亦有卡座，各式其適，而吧枱客更可以近距離欣賞師傅明爐烤肉，係第一時間熱辣辣食落肚就更滋味。
近日餐廳推出宮崎食材主打的新menu，部份更是比較少見的，就讓大家用味蕾飛去日本吧！
炭火燒香辛宮崎A4和牛（$198）
燒得恰到好處，中間嫣紅的肉質份外誘人，入口是陣陣炭燒的香氣，肉味份外濃郁，略為蘸點一下鹽巴，味道更鮮，細細品嚐，再呷一口清酒，真是絕配。
宮崎 Marumi 豚肉日向夏胡麻沙律（$178）
起初以為 Marumi 豚肉係主角，原來望落似去皮檸角的「日向夏」才是真命天子，因為日向夏每年只得三、四最當造，食落口感清新恰人，蘸點胡麻醬會多添一份幽香，就連皮位都可以食，日本食材的優質，真是令人佩服。
擔擔味噌宮崎土佐原茄子拌 Marumi 豚肉（$148）
或者講，今晚每道菜都有水準，但令人喜出望外的，個人推介這個看似簡單的茄子。
茄子經炭火洗禮，肉質軟稔香滑，配上微甜的味噌汁，確是滋味無窮。
元祖 OGURA 南蠻雞頸肉 1956（$138）
炸得固然香口，但真係要趁熱食，因為稍為放耐了，油份便會溢出，影響了口感，而且建議把置面的醬料撥走些少，就更能食得出雞頸肉的味道，而且沾上碟底的醋汁，酸酸地正好平衡了味蕾的感覺。
燒風乾宮崎產潤目鰛魚（$58）
魚肉烤得比較結實，魚頭食落有點甘甘地，好特別。
唐揚宮崎目光魚（$68）
先去掉魚頭，只保留魚身，咬落外層香脆而魚肉軟綿，又是佐酒良伴。
宮崎青檸醋目光魚（$68）
其實目光魚都經炸過，但沾上青檸醋，在凍食下又是另一番滋味。
作為一間居酒居，名物當然不止一樣，仗著人多，邪惡地點了雞內臟拼盤。
餐廳的雞肉串燒選用了「奈良大和妃子雞」。
從左至右 : 分別是雞腎、雞心、雞心頂及雞肝（每款$39），每款都帶有炭燒香氣，頭三款都爽口彈牙，除了雞腎是鹽燒外，其他都是汁燒，而雞膶只烤至6，7成熟，內裡色澤嫣紅，質感粉糯，佐酒一流。
再來是「燒日本青辣椒仔」（$29），烤得表皮微焦，將青椒的辛香逼出來，再灑上少許木魚絲來增添香氣，慢慢食消磨時間最好。
而「大和雞雞翼」（$38）則烤得外層些少焦香，而內裡雞肉緊熟，食落不單富雞味，肉質更是嫩滑，火喉控制得極好。
壓軸當然係「厚燒牛舌」（$88/份），選取了牛舌中間最嫩的部位，而且一點都不乾身，仲有些少肉汁，超正。
其實不單近日主打的宮崎菜色出色，本身店子的名物亦足以令人走一轉，尤其是坐吧枱的客人，可以望住熊熊炭火把食物燒熟時，陣陣香氣瀰漫，真是挑起了食慾，再呷上一杯啤酒，人生幾何！
地址
: 尖沙咀棉登徑8號地下G12-13號舖
電話 : 21046855
味道 :
4 環境 : 3
服務 : 4 衛生 : 4 抵食 : 4 位置 : 5
希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝!
