自從由火線退下來後，變成了家中的大廚，每天花心神弄三餸一湯，又要有營養，真係白頭髮都多幾條。
中菜煮得多，都想攪攪新意，早前受邀參與了由法國奶類食品組織 CNIEL 所主辦的法國牛油推廣活動，仲有機會跟「亞洲最佳女廚師」May Chow學煮菜，機會難逢，真係有錢都未必報得到。
活動係銅鑼灣 Little Bao 舉行，由於是中午較後時分，客人不多，感覺寬敞闊落，又有陽光從室外透內，份外令人舒適。
千呼萬喚，主角終於出場。
整個活動，May Chow 都以輕鬆的語調，活潑的手法，簡單的以法國牛油炮製出一道 Marble Butter。
大會事前已預備好食材及份量，先來的是「雲石絞鹹檸檬欖菜牛油」。
把墨魚汁及鹹檸檬欖菜炮製成兩種不同的牛油，之後相間地排好，然後以牛油紙卷起雪成圓柱形，食用時再切成圓片，非常簡單方便。
當然，示範過後就要落手落腳整，好彩有食友男神 Edward 幫手，好快就攪掂。
其實牛油只係主菜的一部份，另一道煎羊扒即時上場。
用法國牛油起鑊真係好香，羊扒煎至表面微焦，然後切片放在椰菜花茸上面，看似是西餐，竟然加入薑蔥元素。
最後放上先前的牛油片，再以火槍炙溶，好讓牛油的香氣及油潤滲入羊肉。
之後又到自己落手落腳整啦，睇落都唔錯吖！
原來一片牛油，都蘊含大道理，可以令菜餚增添潤色，最重要係大家有無用心去構思！
臨走大會仲送上精美禮物包，真係又靚又實用，今個中午真滿足。
希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝!
沒有留言:
張貼留言