今年到了11月依然有大閘蟹供應，真好，上星期就約了幾位好友，趕及在限聚令的人數，品嚐一頓大閘蟹宴。
早前係荃灣如心海景的 Staycation ，已經享用過餐廳的特價片鴨同龍蝦，實在相當抵食，而今次大閘蟹套餐，CP值同樣的高，每位只不過$498，另加茶芥及加一服務費，想知道套餐有乜菜色？請花少少時間睇埋下邊！
先由「菊花五蛇羹」打頭陣，當然是位上，而且伴以檸檬葉絲及薄脆片。
舀一下，玻璃芡夠薄，蛇肉切得幼細平均，相當討好，湯底鮮甜可口，水準是比預期出色。
主角是清蒸「紫蘇葉蒸大閘蟹（ 四兩半）」，選用上蟹公，雖然未至於爆膏，但蟹膏軟綿滑溜，實在與蟹乸是雲泥之別，就算拆蟹幾花時間，但一班朋友說說笑笑，時間實在好快過。
真係好耐無食蟹，有機會一於追加「六兩大閘蟹」，蟹膏的份量是更上層樓，豐腴口感不減，超正。
再來是一道很傳統的宴席菜「BB柚皮扣北菇鵝掌」，BB柚其實是柚青，汆水足，絲毫不帶苦澀味，加上係自己摰愛菜色之一，當然會加分，鵝掌骨肉分離，但賣相卻沒有破損，而北菇肥大肉厚，扣得入味，其實真係好啱撈飯食。
係時候食碟「蛇湯灼時蔬」清清腸胃。
凍凍地又真係好想食碗「生炒糯米飯」做單尾，咬落軟熟中有煙韌的口感，相當可口，而且份量啱啱好。
意猶未盡下，追加了「蟹粉小籠包」，鮮肉與蟹粉的結合，肉汁未至於澎湃，但吃得出鮮味。
另一道追加的「蟹粉賽螃蟹」，蟹粉份量十足，拌和蛋白後，多添了陣陣蛋香，尤其是蛋白質地嫩滑，喜歡的話，大可加少少陳醋來提鮮。
都有好一段日子沒吃大閘蟹了，但供應時間已不多，真的要抓緊大閘蟹的尾巴，多吃兩餐吧!
Facebook 專頁 : L'hotel
Nina et Convention Centre
地址 : 荃灣楊屋道8號香港如心海景酒店暨會議中心7樓
電話 : 22802923
味道 : 4 環境 :
4 服務 :
4 衛生 : 4 抵食 :
4 位置 : 4
希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝!
