2020年10月13日 星期二

海鮮還是即煮好 X Staycation 飲飲食食 @ 柏記 ( 鴨脷洲 )

 


上星期鴨脷洲 Urbanwood Hotels Staycation,中午以舢舨遊走於兩岸間,仲要食埋「流叔船河」,晚上意猶未盡,一於走進街市食海鮮。

幾年前曾經跟食友到訪過一次,當時仍未有地下鐵,出入都幾轉折,家陣係利東站出,信步而行都只係幾分鐘腳程,變化真大。




幾年前光顧過另一間,感覺良好,今次就試試另一間「柏記」。







由於限聚令下,大家要分檯坐,食物照樣上檯,不過每次都要share




椒鹽鮮魷

新鮮就是不一樣,鮮魷夠厚肉,炸漿薄而且微脆,送啤酒真係絕配。





蒜蓉粉絲蒸扇貝

精髓在於粉絲,蘸滿了蒜香及扇貝的肉汁,鮮香到一個點,加上醬油調較得啱啱好,簡單而味美。




薑葱炒蟹

用上巴掌大小花蟹,肉是沒多少,但夠鑊氣,大概香港人喜歡大牌檔就是主因,薑蔥同樣最吸引我,沾上了蟹汁,真係好惹味。





黃金蝦

絕對係有水準,咸蛋黃緊扣蝦殼,炸得非常香口,蝦肉彈牙,雖然好邪惡,但好難唔食。




蜆芥鯪魚球

毫無腥味,肉質夠彈,魚味濃,不錯。




咕嚕肉

醬汁甜酸調教平均,而且恰到好處,食完碟底無多餘醬汁,但炸得比較乾身,可以更好。




芥蘭炒牛肉

好地道的家常菜,芥蘭選得好,食落爽甜,牛肉就一般。




豉椒花甲

喜歡夠辛勁,花甲肉質好嫩,而且無砂,但有部份未開殼。




豉油皇炒麵

想不到的出色,炒得乾身,夠鑊氣,沒多餘油份,芽菜絲及蔥段夠輕手,不會喧賓奪主,灑上芝麻賣相及香氣會更好,無耐個人喜歡簡單一點,不灑芝麻自己會更加分。

雖然沒有華麗的餐單,但大家食得盡興。






餐後走在街上,鴨脷洲店舖好早已關門,正好在微涼的天氣下,散散步,欣賞充滿本土情懷的特色塗鴉,感受一下久違了的氛圍!

地址 : 鴨脷洲洪聖街8號鴨脷洲市政大廈1

 

電話 : 25552984

 

味道 : 4  環境 : 3  服務 : 4  衛生 : 3  抵食 : 4  位置 : 3

 

希望各位喜歡這篇文章的朋友請在我的專頁上剔"LIKE"當作小小的鼓勵吧!謝謝!

 

http://www.facebook.com/foodiephilip

沒有留言:

張貼留言