或許在記憶中最值得懷念的日子，大概是70至80年代吧！
當時我們一家8口，生活雖然艱苦，每餐都是粗茶淡飯，但母親總是能「粗料精做」，令大家甘之如飴，開餐成了樂事。
時代愈進步，大家逐漸追求更好的享受是無可厚非，但以往好多充滿特色的酒樓卻是慢慢湮沒在時間的洪流，就連菜色都只存留在記憶中。
所以每當有餐廳推出懷舊菜時，總會有班人好似在下一樣食左先算。
近日六國酒店粵軒中菜廳就推出懷舊菜單，不單是晚飯，就連午餐都可以享用到。
餐前先喝碗足火的「節瓜鱆魚瘦肉湯」（$60），很醇香的感覺，鱆魚味都融化入湯裡，尤其是熱辣辣就最啱我。
在懷舊的菜牌中，率先挑選了「釀焗蟹蓋」（$120/隻），其實$120隻在今天看來已是合理，單是拆肉已花了不少功夫；蟹蓋是大約五兩重體形，表面烘得金黃帶微焦，火喉恰到好處，揭開芝士面，內裡是熱燙的蟹肉、蘑菇及洋蔥絲，質地細滑濃香，好味。
再來是邪惡到極的金錢蟹盒（$248/6件），看似平平無奇，但外層是由肥豬肉擀成再炸，所以非常香口，最難得是毫不覺得油膩，咬一口，內裡有蟹肉、梅頭肉鬆、芫荽及芹菜，份量少少，如果人多，每人一件其實啱啱好。
至於桂花炒魚肚（$188），就是一道極考火喉控制的菜色，三種食材各有不同的熟成時間，落鑊時間各有不同，芽菜既要爽口但又小心出水，今次是難得有水準，食落乾身而毫不油膩。
對上一次食蜜椒鱔球（$248），要算到早兩年的「金碧酒家」，但當時只覺得好腥，感覺麻麻，今次卻有截然不同的感覺，鱔球本身厚肉，加上醬汁緊扣下，依然有微脆的口感，用來佐酒一流。
或者係幾款懷舊菜中較為失望係蝦籽柚皮（$178），柚皮本身處理得幾好，而且食落無渣，但玻璃芡埋得太厚，自己反而不太喜歡，亦無必要加上冬菇，簡單的伴以生菜已經好足夠。
年前餐廳曾推出過「食神叉燒」，質感與味道都是水準之作，想不到近日推出進化版「外賣叉燒」，將美味帶回家中。
原來叉燒是即場抽真空包裝，確保衛生，未食之前放落冰格，只要在享用前用熱水燙十分鐘已經可以食用，非常方便。
老實講，選用了脢頭肉位，肉質鬆軟有嚼口，蜜味重，而且邊位有焦香，非常對辦，晚飯時用作加料配白飯一流。
地址
: 灣仔告士打道72號六國酒店1樓
電話 : 28663806
味道 : 4 環境 : 4 服務 : 5 衛生 : 5 抵食 : 4 位置 : 4
希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝!
