2020年4月1日 星期三

貴精不貴多,質數取勝 @ Marina Kitchen and Marine Cafe ( 黃竹坑道香港海洋公園萬豪酒店 )(內附短片)





疫情肆虐下,大家出入真的要小心,尤其是家陣4人一檯的措施,對飲食業實在是重鎚打擊,這個寒冬真的暫時未見底。




但有時偶爾想食餐好既,當然以衛生及安全為首要。



早前跟幾位「生死之交」走訪了海洋公園萬豪酒店,一嚐近日推出的「任點任食」晚餐。

是次重新推出的海灣餐廳午餐及晚餐「任點任食」更為客人帶來震撼優惠,現凡萬豪旅享家會員和海洋公園智紛會員,於星期六、日及公眾假期到酒店海灣餐廳享用「任點任食」,均可享超抵優惠。客人可於網上登記成為萬豪旅享家會員,即時可獲海灣餐廳「任點任食」七折優惠。

(萬豪旅享家會員網上登記:https://www.marriott.com/loyalty/createAccount/createAccountPage1.mi )。而海洋公園智紛會員更可獲六折優惠,屆時客人只需出示有效智紛全年入場證,則可享折扣。



酒店只提供出入口各一,而且入酒店前要量體溫,而進入餐廳前,亦要先行用酒精搓手液消毒,又有消毒紙巾及信封提供,方便客人放入口罩,走的時候,亦見到侍應用火酒消毒餐桌,基本功夫做足,感覺良好。




餐廳最強焦點,一定係任食清蒸環保龍蝦,原隻活生生去蒸,熱辣辣開邊,可以加芝士醬同泰式酸辣汁,好食到無朋友,環顧香港Buffet,真係一隻手數得出,仲要有找。



另一個重點,由以往既鵝肝漢堡,轉成厚切鵝肝多士,充滿油香,口感豐腴,又係必食菜色。



磯燒鮑魚配清酒柚子汁

鮑魚烤得煙韌入味,可以食完又食,單食龍蝦同幾款主菜已經足以回本。






蝦子撈麵

同我食過Buffet既朋友都知道,在下係主食怪,每次都會整碗粉麵,更何況係蝦籽撈麵?


粗麵底淥幾下即刻沖水脫鹼,的確一絲不苟,蝦籽下得重手,而且事前經烘焙過,蝦味更形突出,好食到無朋友。





炆花膠配冬菇及長洲魚蛋


雖然好多自助餐都有花膠供應,但往往只係一碟上就算,家陣又係任食,夠晒滋補。


同場仲有超大粒長洲魚蛋,爽口彈牙,好味。


鐵板燒

其實鐵板燒除了鵝肝之外,仲有西冷、羊架、三文魚及和牛




首選一定是兩款牛肉,西冷烤得啱啱好,內裡肉質嫣紅,味道濃郁;而和牛雖然未至於滿口油香,但已經合格有餘,如果有岩鹽蘸點,相信更能提鮮。

海鮮

為了衛生,有幾款容易比客人摷翻的食物都換成了位上,海鮮就是其中之一。



每位客人會送上海鮮併盤,包括翡翠螺、鱈場蟹爪、海蜆、藍貝與及海蝦,份量十足,而且食完仲可以再落order,包保衛生。


刺身





同樣由服務員送上,有肥大肉厚既帶子、清爽肥美油甘魚及深海池魚,柔韌既北寄貝與及八爪魚,加埋希靈魚,刺身陣容大滿足。






喜歡飲返兩杯配菜,大可加錢來一瓶清酒。






先來一碗姬松茸瑤柱淮山燉瘦肉,入口一陣醇香,舌底生津,夠火喉表現,一口氣消滅了三盅無難道。

至於每晚常備的西湯是忌廉南瓜湯,而中湯是節瓜鱆魚豬骨湯,絕不馬虎了事,老實講,的確飲了不少。

熱葷



蟹肉海鮮鍋巴


真係好足料,尤其是蝦肉爽彈,帶子肉嫩滑,放係脆卜卜既鍋巴上面,滋味滿分。





螺片西蘭花

好有喜宴菜的感覺,味道未必有驚喜,但自己幾鍾意。






仲有鎮江骨、黃金蝦及星洲炒米,真係貴精不貴多。




燒味



問下大家,若然係米芝蓮星級菜館食碟叉燒要幾錢?過百蚊是常識吧!家陣可以任食譚師傅主理既叉燒,厚切之下啖啖肉,有嚼口而富蜜味,少許冰肉位,只欠一碗白飯就完美了。


仲有油雞、燒鴨及烤乳豬,都是自家出品。





雜錦壽司及小食

三文魚籽、玉子、芥辣八爪魚、Konago、烏冬及蕎麥麵







芝士拼盤、Cold Cut及沙律


大堂一角的恆溫櫃,放上了芝士拼盤、沙樂美腸、parma ham、煙三文魚、紅菜頭沙律、煙鴨胸沙律及田園沙律




甜品





一入門口已經好吸睛既旋轉雪糕機,入面放滿了不同品牌雪糕,先係哈根大師,有Azuki MochiCaramel Creme Brulee Mochi,口味獨特,好少機會係自助餐見到,仲有Chocolate Choc Almond雪糕批,又係必食之選。



另一品牌係I Scream,送上Vanilla Madagascar Gelato,相信無乜地方可以品嚐到,大家記得留返少少肚食甜品。





仲有即製焦糖燉蛋(咖啡味)紅豆綠茶慕斯蛋糕、紐約芝士蛋糕、海洋蛋糕、核桃朱古力布朗尼、芒果椰子慕絲、焦糖布甸、士多啤梨意式奶凍、雙重朱古力松露蛋糕、檸檬撻及朱古力鬆餅


至於蛋白杏仁茶,同行朋友一致大讚,質地輕盈,甜度適中,杏仁味不會過於濃烈,好味。

當然少不了即製班戟及窩夫

甜品的種類,雖未至於勁多,但每款都有水準,值得大家走一轉。



P.S : 另外,酒店更有「食.住」家庭樂住宿計劃
計劃適用於逢星期五至日晚入住的家庭,價格為每房每晚港幣$1590 起,包括豪華客房住宿一晚、海灣餐廳兩位成人及一位小童自助早餐,以及海灣餐廳全新推出兩位成人及一位小童用「任點任食」午餐或晚餐。


地址 : 黃竹坑黃竹坑道180號香港海洋公園萬豪酒店海灣地下

電話 : 35551700

味道 : 4  環境 : 4  服務 : 4  衛生 : 5  抵食 : 5  位置 : 4

希望各位喜歡這篇文章的朋友請在我的專頁上剔"LIKE"當作小小的鼓勵吧!謝謝!

沒有留言:

張貼留言