身邊的朋友都知在下是個Buffet迷，所以一遇到有質素或抵食既自助餐，都會第一時間搵自己，齊齊食餐勁既。
位於跑馬地入口附近的皇冠假日酒店，位置極佳，頂樓的景觀可以遠眺馬場，極之開揚。
酒店餐廳Kudos位於一樓，環境謐寧舒適，其實很有fine dining feel。
原來餐廳提供semi-buffet，對食物的要求會更高。
生蠔
有荷蘭Imperial、法國
Brittany、Fine de Claire、愛爾蘭石蠔 Rock、澳洲Coffin Bay、南非生蠔及紐西蘭生蠔，對於蠔迷絕對是一個吸睛點，先後取了兩round，消滅一打話咁易。
Seafood Station
另外別睇小海鮮吧位置不大，麵包蟹、翡翠螺、阿拉斯加長腳蟹、青口、熟蝦及紅龍蝦仔，麵包蟹蓋滿是蟹膏，就算膽固醇超標都忍不住吃了半個；翡翠螺夠大隻，食落柔韌有彈性；長腳蟹肉質鮮甜可口，而其他幾款都沒有絲毫雪味，食得過。
九層塔
近年大熱的另類煮食手法，每次選用不同海鮮，只要聽到鈴聲，便知道又有新一輪海鮮出爐了，先後試過鮑魚、蟶子、蟹、蜆、花甲及鮮蝦，每款都新鮮彈牙，令人食過不停，在下挑剔，只嫌每次都要等，太麻煩了。
主菜
款式極多，由海鮮類中的魚蝦到肉類的牛羊到有。
新鮮游水波士頓龍蝦，在中西式的煮法中，選了用忌廉芝士焗，表面的芝士略為焦香，肉質稍微過熟，但連芝士一齊食，又十分滋味。
另一道是燒紐西蘭羊扒拌檸檬薯蓉，羊肉有少許羶味，就算女仕都應該接受到，但又是過了火，肉質有點結實，美中不足。
至於美國熟成西冷牛扒配燒新薯、烤青露筍及半乾油浸蕃茄拌牛仔肉汁，又是略為熟了點，但無損肉味，落order時不妨指明要medium
rare。
還有香煎智利鱈魚拌大虎蝦及芝士粟米蓉配蕃茄沙沙，其實店方在海鮮的處理上比肉類更佳，鱈魚保留了幼嫩的肉質，而虎蝦彈牙，side dish的粟米蓉質感細緻，配上蕃茄沙沙，既美味又健康。
還有美國熟成牛柳伴鴨肝、深海紅蝦意大利扁麵伴龍蝦忌廉汁西式忌廉芝士焗或香烤波士頓龍蝦及法式燴雜菜及青露筍配紅酒汁可供選擇，如果有選擇困難症，真的幫不了。
刺身
在刺身吧可以找到三文魚、八爪魚、吞拿魚、馬刀貝、甜蝦及帶子，肉質新鮮彈牙，又沒有討厭的雪味，質素又有保證。
湯
有好幾款湯，干邑龍蝦湯、蜆肉周打湯及火喉十足的中式燉湯，而中式湯就最得自己歡心，清甜芳香，忍不住喝了兩三盅。
即煮意大利粉及意大利雲吞，可以隨意選擇蕃茄醬或者白汁，意大利粉滿有嚼口，而雲吞都給比下去了。
凍盤
有雜錦凍肉併盤、水牛芝士蕃茄、精緻的輕燒牛肉伴焦糖洋蔥配岩鹽油醋、鴨肝批伴無花果醬、蟹肉牛油果、挪威煙三文魚、扒意大利雜菜及匙上的吞拿魚蓉拌魚子醬，試了水牛芝士蕃茄、鴨肝批伴無花果醬及蟹肉牛油果，既有軟滑，又有rich口感，又或是鮮甜，總之就是夠多完化。
豉油皇乳鴿又是一道在buffet少見的食物，滷得既入味，肉質又嫩滑，超正，極之推介。
沙律吧
清清地，又可以在沙律吧來一份自製沙律。
甜品
餐廳有令人雀躍的Gelato 軟雪糕機，而且有血橙及香蕉兩款口味，即製出品果然甜美幼滑，仲可以自行加添topping。
另外仲有7-8款口味 Häagen-Dazs
雪糕，有朱古力、雲尼拿、士多啤梨、曲奇忌廉、綠茶、紅莓及芒果兩款雪葩，對於雪糕狂迷的在下，必然是一次過掃，可以話口味大滿足。
如果不喜歡雪糕，可以係甜品區搵到鮮芒果淡忌廉蛋糕、士多啤梨拿破崙、紅酒燴香梨、藍莓芝士蛋糕、檸檬撻、蘋果金寶、檸檬芝士蛋卷、黑白朱古力慕絲蛋糕、意大利咖啡芝士餅、黑糖椰子慕絲蛋糕、泡芙以及麵包布甸。
之前吃得實在太飽，只取了少見的紅酒燴香梨及蘋果金寶試試，前者酒香四溢，少許甜美，很特別，而後者反而很大路。
整個semi-buffet變化大，又有各種不同的食物，最啱心多或者有要求的朋友。
P.S : 週一至四收費 (成人$568
/ 小童$338)；週五、六、公眾假期及前夕 (成人$598 / 小童$368)
地址 : 銅鑼灣禮頓道8號香港銅鑼灣皇冠假日酒店1樓
電話 : 3980 3000
味道 : 4 環境 : 4 服務 : 4 衛生 : 4 抵食 : 4 位置 : 4
希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝!
