2011年9月28日 星期三

秀麗的川粵菜~~~俏江南

近日發覺有三類人大可不睇在下深圳食評.

第一類是從來不會北上人士,反正唔上,睇黎做乜?

第二類對大陸食品無信心人士,講乜都唔信,樣樣都話坑渠油或一滴香,唔去未試過又有資格出聲咩?

第三類是以為百幾蚊人仔食唔到好野,食到都係垃圾人士就更加唔好睇,香港星級食肆係好好,但幾百蚊中至少有一半比租同燈油火腊,食落肚既野,材料錢可能比深圳仲少,不過名牌效應,點講都無用.

今次深圳遊又試一間新店,京基百納購物中心算是近月新開的商場,名店林立,請來國外人士設計,充滿時尚氣息,旁邊是一幢仍在興建中的百層金融中心,立志想成為深圳地標,俏江南連鎖店位處其中,名氣響,大概是花邊新聞的效應.

闊落的空間,豪華的裝潢,處處以中國面譜來當店家標誌,就算門廊,餐具器皿,都印上同一記號.

Picture

就算是普通的一間廂房,亦掛上誇張的水晶吊燈,彰顯店內的華麗氣派,高背餐椅,獨立水吧及洗手間,偌大的空間感,寧靜舒適的氣氛,將平平無奇的菜餚帶到另一境界,真是比貴少少都變成合理.

Picture

未上菜先來一個餐前水果,再翻開竹簡做的茶譜,八十八蚊一壺大家平分,亦不過是八蚊一位左右,不貴,至少普通貨色都要六蚊位.而且中途由服務員不停添水,細心程度,直逼香港高級食肆.

PicturePicturePicture

麻醬油麥菜 ($19) : 每條油麥菜都切大小均一長短,再用青瓜片卷成一條條,然後澆上芝麻醬,雖然食味清淡,但賣相清新討好.

Picture

蓉城口水雞 ($38) : 同普通口水雞相差不大,麻辣醬蓋過整碟雞面,望落以為好辣,但根本是微辣級數,雞肉浸得剛剛好,不會過於死實.

Picture

晾衣白肉 ($38) : 同名菜係巴蜀風月或昔日老院子賣相好好多,至少真係有個木架將肉片晾係架上,但今次只不過將五花腩薄切平舖係碟,配以雙醬汁及甘筍洋蔥絲,肉質夠嫩,再蘸點少許辣汁,好惹味.

Picture

干煸四季豆 ($32) : 火喉上肯花心機出品,四季豆身起摺紋,是經時間均勻吸取油份及去水,令豆身慢慢變軟,再加入豆瓣醬一齊炒,雖然簡單,但平凡中見真章.

Picture

江南鴨卷 ($32) : 又是一味手工菜,將鴨蛋黃釀入鴨肉中切片,難得的是兩者緊扣,並沒有散落,而且蛋香將鴨肉味道不足之處都補充了,花這麼多功夫,算來不過是四十蚊左右,難得.

Picture

老醋蜇頭 ($38) : 醒胃的前菜,老醋未夠香,海蜇頭質地好削,爽脆口感不足,奇怪地,越平凡的菜就越出事.

Picture

夫妻肺片 ($38) : 畢竟店方主打川菜,總不成所有菜色都辣不起,今次認真得多, 牛肚,牛頭皮及牛心片給辣油泡浸過,未放入口已經感受到一陣麻辣香味.而且牛心或牛肚片有嚼勁,用來送酒一流.

Picture

蒜泥白肉 ($38) : 蒜泥在川菜館子中,算是刴得夠幼細,雖比不上滿庭芳,但已經少見, 有時候見到粗枝大葉,亂刴一通的蒜粒,已經打了折扣,腩片給厚厚的花辣及紅椒碎蓋過,加上麻油及辣油,麻辣度跟之前的菜色是兩碼子的事.

Picture

桂花糯米藕 ($28) : 除西湖春天外,真的找不到有爽口的蓮藕片,其他幾間都是粉質重,甜度高,食落好膩,有時只試過就算.

Picture

鮮青椒水煮魚 ($168) : 原先打算用江團魚,後改為桂花魚,淡水魚最怕有泥味,今次是丁點都沒有,魚骨不算多,肉質鮮嫩,灼得恰到好處,青椒香味似乎沒紅椒強烈,但辣味卻是一點也不輸蝕.湯鍋底的麵條柔韌有彈性,每一口都帶上青椒的辣味,在口腔內徘徊,額角已開始冒汗.

Picture

古法雙椒蒸江團 ($168) : 誰說手功菜難找,深圳多的是,江團魚起肉切片,然後再逐片卷上甘筍絲及蘿白絲,分別用上紅青椒粒去蒸,兩種色澤不同的椒粒,美觀之餘,食味亦各有千秋.火喉掌握亦準確,肉味鮮嫩,百七蚊一碟真的不貴.

Picture

芽菜扣肉 ($58) : 芽菜大家都沒有踫,反而扣肉炆得未夠稔,時間不足,肥瘦位六四比,肥位較多,入口尚算軟綿,甘醇芳香,只欠一碗白飯.

Picture

四川樟茶鴨 ($48) : 好難想像用四十八蚊可以食到咁既水準,鴨皮酥脆,而鴨肉軟糯,有肉汁,配上幾片荷花餅,形與實跟豫園是不相伯仲.

Picture

紹子醬燒茄子 ($38) : 其實平平無奇,茄子煎得徹香,然後將醬汁收水,辣味一般,反而無乜茄子味.

Picture

蜜汁火肪 ($88) : 金華火腿質素始終差少少,咸香味未夠層次,肥肉位欠奉,桂花蜜燴得欠火喉,配菜的炸腐皮色澤金黃,比起豫園控制得更好.

Picture

東江千叶豆腐 ($68) : 豆腐切薄片,平靜的躺在碟上,每一片都呈現完美的姿態,大小均一,數十片中沒一片有破損,難得.單是勾芡似乎太單調,再用上蝦仁,青豆,腩肉粒及甘筍粒炒好,放在碟中央伴食,豆腐嫩滑得少見,但豆味單薄,都給其他濃味的食材蓋過了.

Picture

文房四寶 ($18) : 真的是可以食得的四樣玩味菜,紙是蛋清,筆是酥面(蓮蓉餡),磨是紫米酥,鎮尺是蛋酥,講真酥皮是筆尖,放得太耐,已經變得毫不鬆化,蛋清有點韌,磨及鎮尺反而熱辣辣,食就無謂,十八蚊整套上又幾得意.

Picture

雞汁鍋貼 ($22半打) : 好得,每件煎得剛好,底部微焦夠脆口,雞肉汁恰到好處,件件飽滿.

Picture

拔絲 ($38) : 勁失敗,係人都知拔絲要趁糖醬仍熱辣辣又軟熟既時候放入冰水中,令表皮急速冷卻,形成一絲絲外形,但服務員竟然用一個細既白飯碗冰水,想整好一大碟拔絲,簡直天方夜譚,當再換一大鍋冰水回來之時,已經起不了作用,外皮堅實不脆口,結果試完一件就放棄.

Picture

南瓜餅 ($22半打) : 賣相趣緻,價錢又唔貴,每一件都熱辣辣,內面是少許蓮蓉餡,甜而不膩,好好味.

PicturePicture

担担麵 ($8) : 奉勸大家係俏江南千祈唔好叫麵食,先後兩碗都在水準以下,雖然只係八蚊,但浪費食物始終都唔係咁好.麵質軟綿綿無咬勁,湯底味道淡,可以放棄.

酸辣粉 ($8) : 辣味太輕,算是少辣程度,薯粉又不夠煙韌,比起街邊貨還要差勁.

Picture

石烹嫩豆花 ($58) : 起初見近六十蚊一份豆花是偏貴,但由師傅推車仔到大家面前,即沖豆漿落礦石,再等五至十分鐘凝固,食落質感有點輕,豆味尚欠少許,不過有辣油,菜圃及麻醬幾種配醬給大家轉口味,又幾得意,香港亦不常見.

PicturePicture

其實不是有太多負面的報導,今日深圳會更加繁榮,食肆在軟硬件的配套上更是一日千里,香港食肆再在成本飛漲的環境下經營,恐怕只會步入有心無力的處境.

有不少人對深圳食肆有誤解不足為奇,香港街市買魚都有機會中毒,食菜都會出事,所以多年來帶朋友北上,都只會去一些有聲譽及清潔度高的食肆.

我同意有人說~~而未親身去嘗而又主觀評論的便更多,只見有人用一刀切的言論,未免有井底之蛙的感覺,世界之大,總有值得欣賞的地方,有容乃大,何必對意見不同的人事事反對,其實去都未去過,閉門造車,何來證明?咪天真地拋下一句,唔去都知啦~~~.

P.S : 有人話唔睇我食評,無所謂,但唔好又事後睇左唔認,仲要用兜兜轉轉技倆,死纏爛打,記住,係你話唔睇我寫既野架.睇唔起,就無謂抽抨啦,係咪?

地址 :  羅湖地王深南東路5016號京基百納空間購物中心KK Mall L325

電話 : (0755) 2290 9288/2290 9199

味道 : 4  

環境 : 5  

服務 : 5  

衛生 : 5  

抵食 : 5

地點 : 5

沒有留言:

張貼留言