深圳鐡板燒五花八門,最具歷史有中森明菜,忍者居,近一點有大漁,巴西燒烤及百度,多數屬於連鎖店,但部份水準已開始日漸下滑,大不如前.
而近日較引人注目的盛八,優佳一,天使灣,萬膳及德川,算是港人最常去的食肆.
閒日的中午,就來試試,究竟是否名副其實.
從國貿站E出口往前行不到半分鐘,就可以到友誼酒店,三樓一出電梯,掛的是居酒屋的燈籠,但排場卻是另一回事.
兩小時任食任飲,作價一百三十八蚊,在深圳來說不平宜,相比香港當然有一定的吸引力.
坐在偌大的吧檯前,翻開餐牌一睇,跟其他幾間同類型的相似,但次前各食友所講的貴價食品通通不見了,除非要另行加錢.
就先來一杯西瓜汁及刺身拼盤.
西瓜汁雖然是滲了水,但依然夠凍,比起天使灣好得多.而所謂刺身拼盤,竟然可以放三文魚,鯖魚及墨魚各三片就算,太求其了罷? 只好即時退貨,另落ORDER.
開始起動的第一款是牛舌,份量真的夠多,看來想早早KO食客,以免多點,不過牛舌用上青紅椒去炒,又確實香口惹味,但有一般通病,太肥膩了.
先前再落ORDER的刺身終於上場,有吞拿魚,北寄貝,甜蝦及八爪魚,賣相雖然尚可接受,但置底的雪粒已開始溶化,可能已用了一段時間,當中甜蝦肉質有點霉,而其他幾種並未有雪味,已經好好.
自已一向喜歡食海鮮,今次先要元貝,虎蝦,蠔及海參.元貝及蠔煎得夠香口之餘,肉汁亦鎖得好,而自己不想再將熟食放回生殼上奉客,所以叫師傅直接上碟好得多,而虎蝦只不過是街市上普通海蝦,不過外殼煎得香脆,肉質就略為結實,海參反而有驚喜,是是日唯一再落ORDER的食物,切幼條的海參,用上西芹條去炒,幼嫩爽口,西芹又夠翠嫩,好味.
而菲肋牛扒是用上洋蔥炒,好香口,而且師傅有問幾成熟算有心,不過結果都係叫五成,實際七八成,得啖笑.
法式小羊扒是肉類中最正的一道,肉味夠羶,骨肉間脂肪位油香足,入口軟綿綿,肉質鬆化,值得一要.
牛仔骨雖然只得一件,骨膜位不如羊扒香滑,亦煎得過熟,但已經不錯.
西冷扒用蒜粒去炒,十成熟,死得啦,咬都咬不開,只可以選幾粒食下就算.
每一間鐡板燒店都有的鵝肝蒸蛋,而且去了這麼多間,幾乎沒一間失手,可信性頗高,蛋白本身蒸得剛好,加入蟹籽及一小片鵝肝更是神來之筆,令到口感更多完化.
燒青口是雪貨,以為用洋蔥粒,蒜粒炒香放面可以香口一點,其實只要撥開配菜不要,便會發覺未乜味,而且死實實,好彩只得兩隻.
鹽燒大蝦夠乾身,蝦殼燒得香脆又不帶焦位,可見掌火的師傅好專注,肉質夠咸香但不會彈牙,這是來料的問題,與師傅無關.
鹽燒冬菇夠乾身,菇身軟綿,亦看得出師傅有心機處理食材,可能是中午人少的關係,但個人在幾款處理手法中,最欣賞反是爐端燒.
令人最刻骨銘心的想必是章紅魚,墨魚刺身,章紅魚食落無味,就連腥味都沒有,真奇怪,而墨魚刺身咬落發覺肉質竟然有點霉,自已以為食錯,吞左少少,結果換來三日腹瀉,好慘!
想不到炒蟶子比香港不少食肆還出色,份量不單夠多,而且加上九層塔及辣椒去炒,帶有少許泰式風味,肉質飽滿又香,同樣出品及份量,在香港少說都要三四十蚊一碟.
炒雜菇有點兒搵笨,只得金菇及冬菇絲,油落得好重手,而且菇類太少,名不符實,可以加點秀珍菇,雞骴菇之類,相信賣相及味道會好好多.
在幾款肉類中,T骨扒煎得微香,肉質不太結實而帶肉香,只是之前肉類太多,感覺有點膩,如果能一早食,味道應會吸引得多.
上湯魚翅得啖笑,其實要一碗只不過睇睇究竟係什麼一回事,水汪汪沒下豆粉芡算有良心,無乜翅針亦在預計之內,最估不到的反而是用上大量紹菜絲去熬湯,當是一碗例湯算了,不要心存寄望.
其實到最後,當然要食雪糕,是日有三四款選擇,但未知是否已經中招,胃部開始發痛,只好求其來一份香草及草莓味,事實上,前者比較滑,而且香革味不俗,反而後者草莓味略輕,不過已經可以收貨.
如果不是之後出現腸胃炎,可能會比高點分數,但不論食物如何出色,令人有事就不能推介,是嗎?
P.S 雖然已改名德川,.但不論在餐牌或是結算單,依然是印上『谷川庫浪』,可見是同一間公司.
| 地址 : | 羅湖國貿嘉賓路3011號友誼酒店三樓 |
電話 : (0755) 8225 8841/8225 8842
味道 : 3
環境 : 4
服務 : 4
衛生 : 2
抵食 : 3
位置 : 5
沒有留言:
張貼留言